Mappa del Sito
Home Page
Inizio Pagina
Pagina Precedente
       
Dopo tant lanpigà finalmente l’avòn brusàt, l’è stàt spetàt metà cuaresima e cussì dopo tanti àni le stada fata ància la ‘vècia’. Dal vinti de denèr l’era cuèrt co un telòn, ( dopo avè ciapàt cuindese dis de ploia, al se aveva suiàt, e alora prima che in ciapàs anciamò l’avòn cuerdùt) in modo da esse pronto pà al dì destinàt, (sàbo vintitre de febraio), avòn ància vardàt dute le previsions del temp, in modo da nò ciatà dornade de ploia. Sabo ventitre, se son ciatath ‘ntel lòc ‘na che l’era al panevin, e avòn tacàt a discute su che vestiti che aveane da mete ala vècia (de mieda cuaresima), su come fàla e via discutendo… Dopo essesse metuth dacordo avòn tacàt a inplenì la roba;le cialthe, la cotola, la ciamèsa, co la pàia. “Fai le giambe pì grosse…”“La cotola l’è massa curta…” “Vara che la schena, l’è goba, faila pì dreta…”. Chisti ‘i era i discorsi che se feva intànt che se la feva su. Cùan che l’è stada pronta ’i avòn leàt drio la schena un pal e dopo l’è stata metuta in thima panevin, co dele fassine l’è stat fat un pòc de ponta e dut l’era pronto pà la sera. Intànt l’era rivàt mesdì e cualchedùn l’à pesàt bìn da dì a tò ‘na piastra, un poce de luganeghe e dela polenta, cussì avòn magnat là in compagnia e legria. Verso ‘na therta ora l’è tacàt a rivà le torte fate da brave femene de Dardac, ‘i ‘nera de duth i tipi, una pì belae bona de l’altra, l’è stade taiàde e preparade pà la sera. Rivat le oto e meda, cò tanta dhent che l’era ormai rivada, al plevan l’à benedìt al panevin, e subito dopo lo avòn inpiàt, l’è partit come na ciandela, “Bel, proprio bel, l’era àni che nò l’ardeva cussì bìn …” la diseva la dhent e intant al fòc al vanpava sempre de pì! “ Finalmente l’avòn brusàt…” L’è stat al comento de duth nealtre che l’aveane fat ( dal prin ciar de spine che aveane portàt l’era passàt cuasi doi mesi). Speròn che al prossin àn al temp nol ne fae tribùla come stò àn, ància parchè al panevin l’è bel brusàlo al so dì giusto. Se vedòn…al thincue de denèr doimilanove….
p.s.: ades passà de là e nò vèdelo pì al par de stran….